由2002年7月1日，至2008年11月22日，總共2336天...
經過6年半時間，我o係2008年11月22日傍晚時份正式回復單身。
識o左P先生7年...大家由朋友變成莊友，由莊友變成兄弟，由兄弟變成情侶，再由情侶變返兄弟...
7年前，因為宗教活動o既關係，我遇上o左P先生。同佢過見過幾次面之後，我開始有一種從未有過o既感覺...嚴格o黎講，o個次就係我第一次對人有感覺。之後o個半年，我選擇o左將自己o既感覺收埋，一來因為我冇經驗，唔知可以點表達；二來，始終大家都係男仔，我唔想因為一時衝動，搞到大家連朋友都無得做。最後，o係佢準備離港進修，我以為終於可以放低佢o既時候，佢竟然向我表白...原來一個我暗戀o既人，竟然同時暗戀緊我...就係咁，我地開始o左，佢成為我呢世仔第一個情人。
之後o個6年半，我地經一齊歷過好多o野。先係佢去英國讀書，大家分隔兩地。之後佢畢業返o黎做o野，我都仲讀緊大學。到我都畢埋業，出o黎做o野，佢o既事業開始有o的成績。到2007年，股市暢旺，佢賺到佢o既第一桶金，而我o既事業亦開始上軌道。終於到o左08年初，我地決定買樓，拉埋天窗住埋一齊。
好景不常...08年9月，即係新屋入伙即月，E先生o既出現，令我同P先生o既關係出現變化。到o左11月，P先生終於向我提出分手...
本來感情已死、死者已矣，都無謂追究對錯。但如果唔吸取經驗、檢討教訓，他日只會重蹈覆轍，再次受傷。
就分手一事，P先生俾o左好多理由我...最初，我都以為係自己o既問題，以為自己變o左。但後來冷靜o左，諗返，其實大家都變o左，只係變o既速度唔同，令到大家o既距離越隔越遠...之不過，第三者o既出現，令到呢o的所謂o既理由變得毫無意義。如果照P先生所講，佢對我o既感情o係半年之前已經轉淡o左，何解唔o係半年前分手？更甚o既係，既然佢覺得我唔係一個可以同佢廝守一生o既人，點解4月o個時仲去買樓？點解到9月裝修好o既時候仲要搬埋一齊？無論我點努力，我始終都無辦法解答呢o的問題。
成件事，有唔開心，有嬲，亦有失望。唔開心o既係我從無諗過大家會咁樣收場。我將自己o既未來投資o左o係佢身上。以為買o左隻大藍籌，點知o係一夜之間變成雷曼迷債。至於嬲，我係嬲佢o係我行o左無得返轉頭o既一步之後先同我分手。我覺得，如果佢選擇o係大家住埋一齊之前分手，我會好過好多。唔開心一定有，但起碼唔會咁多logistics o既問題。我更加唔需要同屋企解釋，做乜搬出去唔夠兩個月就搬返轉頭。至於失望，係對P先生o既人格失望。換轉係我自己，如果係因為我鍾意o左另外一個而選擇同對方分手，我只會同對方講對唔住...但o係今次成件事裡面，P先生選擇o左將一切o既責任推o係我身上。由始至終，佢透過不同o既事例不斷指責我點樣唔顧佢感受，卻從冇因為佢o既不忠向我講過一聲對唔住。
o係分手o個日，我同P先生講：我明白大家距離遠o左，如果佢唔願意付出努力去調整，分手都係遲早o既事。本來大家可以好來好去，但成件事因為第三者o既出現而變得複雜。我唔敢話自己完全無責任，但如果要我蓋棺定論呢7年感情o既死因，我無辦法唔將之歸咎於P先生同第三者。
o係好多價值觀o既問題上，我o係一個左派。但o係愛情觀上，我仍然停留o係石器時代...我仍然係覺得，如果我無把握同一個人一生一世，我唔會同佢開始；同得佢開始，就預o左係一世...我諗事到如今，我可能都係要送自己去再培訓...
下回預告：曖昧...尷尬...
No comments:
Post a Comment